UN CELTA GRAVEMENTE ENFERMO

O Celta vive horas moi tristes. A afección desertou en masa de Balaídos e os poucos que aínda resisten aproveitan a mínima ocasión para cuestionar a xogadores e técnicos. O certo é que ten que ser duro aturar unha temporada como a que está a facer o equipo vigués, un enfermo que despois do de onte (1-2) pasou da gravidade ao estado de coma. Incapaz de crear xogo, foi superado dende o inicio por un Eibar en postos de descenso e que non marcara nos seus últimos sete partidos fóra de Ipurúa. En cambio, por momentos parecía o Vila Real de Pellegrini ante un Celta apático e inmóbil. Os de Murcia viven nun estado de ansiedade tal que calquera cousa que pretendan vailles saír irremediabelmente mal. A cousa complícase se inda por riba o ídolo da afección esquece que os pases de gol hai que darllos aos compañeiros e non aos rivais. Complícase de igual xeito se Ghilas desaproveita un penalti ou se un tipo chamado Sutil che mete un golazo de volea por toda a escadra. Murcia parece estar condenado despois do de onte. Un cambio de adestrador podería ser un pequeno shock para recuperar o pulso cardíaco, pero o enfermo vai seguir enfermo igual de aquí ao remate da temporada.