DALLAS CONSUMA O ADEUS DOS SPURS

Dallas elimina a San Antonio. Dende o ano 2000 que os Spurs non eran eliminados na primeira rolda dos playoffs. Dallas, pola contra, non gañaba unha serie dende facía tres anos. Para o equipo de Rick Carlisle foi máis fácil do agardado. Aflorou por fin (106-93) a calidade do conxunto, que apenas aparecera na Liga Regular e foi suficiente para superar uns Spurs que acabaron depedendo en exceso de Parker e Duncan, e botando moitísimo de menos o carácter gañador do Manu Ginóbili. Por vez primeira na serie, o alemán Dirk Nowitzki asumiu o liderado en anotación dos Mavs (31 puntos). Nas semifinais de Conferencia agardan, posiblemente, os Nuggets, no que promete ser unha serie apaixonante para dirimir ao máis que probable rival dos Lakers na Final de Conferencia. Os Spurs levan un duro golpe que esixirá unha renovación do equipo de cara ao futuro. (Xogador do partido: (Dirk Nowitzki)

Os Lakers xa están nas semifinais da Conferencia despois de lle gañar (96-107) aos Jazz no cuarto partido, na volta ao Staples Center. Unha vez máis foi manifesta a superioridade do equipo de Phil Jackson sobre os Jazz, nos que nin Boozer nin Williams estiveron nos seus números. O equipo de Jerry Sloan dá por concluída unha das súas temporadas máis discretas dos últimos anos. No debe dos Lakers, outra vez, a súa relaxación no treito final do partido que permitiu unha recuperación do rival que, con todo, nunca chegou ameazar verdadeiramente o resultado. Gasol (17 puntos e 11 rebotes), Odom (26 puntos e 15 rebotes) e Kobe (31 puntos), foron novamente os mellores do seu equipo. (Xogador do partido: Lamar Odom)

Os Sixers perden en Orlando despois dunha pésima arbitraxe: Orlando gañou (91-78) o partido pero afrontará o sexto sen a súa grande estrela. Dwight Howard foi suspendido cun partido de sanción despois do cobadazo que lle arreou a Samuel Dalembert na loita por un rebote. Os árbitros do partido vírono pero no canto de expulsalo pitáronlle apenas unha técnica. No mellor blog sobre os sixers contan perfectamente como Howard, que fixo 24 puntos e 24 rebotes, cometeu unha chea de infraccións: pasos, dobles, faltas... ante a connivencia arbitral. Iso non quita que os Sixers, independentemente do seu incontestable espírito de loita, volveran caer nos mesmos erros que lle están a impedir gañar partidos ante un equipo que non é moi superior. Érranse demasiados tiros fáciles e cométense unha chea de imprecisións en contras aparentemente sinxelas. Andre Miller non tivo o seu mellor partido e Lou Williams segue sen ser o revulsivo anotador da Liga Regular. Tampouco Young está a gusto e Speights, o prometedor rookie de DiLeo volveu ver todo o partido dende o banco. Iguodala, porén, está a cumprir co seu papel de líder (26 puntos), malia que segue errando demasiados tiros libres, e Willie Green e Dalembert está facendo partidos máis que aceptables. Os Magic, desta volta, afinaron a puntería dende a liña de 3, especialmente un gran Rashad Lewis, e Alston anotou canastras decisivas. Vexamos que acontece esta madrugada sen Howard na cancha, e sen Courtney Lee, que abandonou a cancha lesionado e é baixa. (Xogador do partido: Dwight Howard)

Os Celtics gañan tras unha nova prórroga (104-106): Esta serie vai pasar á Historia. Será lembrada por moito tempo pase o que teña que pasar ao final. Pero Bulls e Celtics están a ofrecer un espectáculo extraordinario. Hoxe, nun partido de máxima emoción e igualdade, o equipo de 'Doc Rivers' impúxose despois dunha prórroga e de que Brad Miller errase dous tiros libres a falta de dous segundos que poderían ter forzado outros cinco minutos máis de xogo. Nos Bulls, Salmons e Ben Gordon anotaron sempre nos momentos decisivos e Derrick Rose tampouco se agochou, se ben cometeu algún erro froito da precipitación. Noah estivo espectacular no rebote apañando 17. Nos Celtics Ray Allen acabou desquiciado e eliminado por faltas pouco antes do remate do tempo regulamentrio, pero eríxironse tres grandes protagonistas: Rajon Rondo, que está a completar unha serie incrible e quedou a só dous rebotes do seu terceiro triple doble en cinco partidos (28-8-11), Paul Pierce, irregular durante o partido pero que procurou sempre a responsabilidade nos momentos decisivos sen que se lle encollese o pulso, e Kendrick Perkins, o center, que fixo 16 puntos e 19 rebotes. Ao final do partido, sobran os comentarios sobre o mal gañar de Kevin Garnett. (Xogador do partido: Kendrick Perkins)

Os Blazers salvan o primeiro match-ball. Estaban obrigados a gañar no Rose Garden para evitar unha eliminación que tería sido un auténtico xerro de auga fría despois das boas sensacións da Liga Regular. E facíano con Brandon Roy con molestias gripais e Lamarcus Aldridge con problemas nun ombreiro. Mais os dous foron, ao final, os principais artífices (con cadanseus 25 puntos) da vitoria dos de Oregon sobre os Rockets, que completaron o seu peor partido na serie, con 3-2 a favor dos texanos. (Xogador do partido: Brandon Roy)

Nuggets- Mavericks, primeiras semifinais confirmadas. Os Denver Nuggets certificaron (86-107) na súa cancha a súa brillante clasificación para as semifinais da Conferncia Oeste. É a primeira vez que o conseguen dende 1997. Agora crúzanse nunha serie que se promete apaixonante cos Dallas Mavericks, que veñen de eliminar aos Spurs. Onte volveron impoñerlle un avultado marcador aos Hornets que, con todo, inda mantivern o tipo máis da metade do partido. Finalmente, nunha enxurrada de acertos, os de George Karl marcaron un parcial de 24-4 e romperon definitivamente o partido. Carmelo Anthony, nado en Denver, foi o mellor do seu equipo con 34 puntos. (Xogador do partido: Carmelo Anthony)

Os Hawks sentenciaron no primeiro tempo. Está a ser esta unha eliminatoria ben igualada marcada, en boa medida, pola irregularidade dos dous equipos. O que pase poucas opcións parece ter para lle complicar as semifinais aos Cavaliers. Desta volta os Hawks fulminaron (91-106) aos Heat despois dun primeiro tempo no que o equipo de Spoelstra non soubo manter a calma nun segundo cuarto marcado pola extrema dureza e os piques entre varios xogadores. O caso é que ao descanso o parcial era de 40-63 e os de Miami decidiron deixar as cousas para o sexto partido na súa cancha. Josh Smith intentou un mate de concurso, pasando a bola por debaixo das pernas, que suscitou a indignación da prensa de Miami e aventura máis piques de cara ao seguinte partido. (Xogador do partido: Ronald Murray)

(Foto da web da NBA)

HUMILLACIÓN HISTÓRICA

Incrible!. Os New Orleans Hornets sufriron unha humillación para a historia na súa propia cancha. Perderon de nada menos que de... 58 PUNTOS!!! (121-63) ante uns despiadados Denver Nuggets, que en ningún momento pararon o seu baloncesto desbordante. Foi un partido dos que marcan unha franquía. Os Hornets, que xa deran sinais preocupantes na segunda parte da Liga Regular e no inicio desta serie de playoffs, xa non pode agochar que son un equipo ben cativo, ermo de talento alén de Chris Paul e David West. Foi un partido que pode marcar tamén, a carreira de Chris Paul. Con ChaunceyBillups en frente, fixo o peor partido da súa vida. Apenas anotou 4 puntos e deu 6 asistencias en 36 minutos que permaneceu na cancha. O público abandonara en masa o New Orleans Arena xa o remate do terceiro cuarto, perplexo ante o que estaba a presenciar. Denver, pola súa banda, relambeuse como unha hiena ante unha vítima tan inocente. Xa sentenciara no primeiro cuarto (36-15), pero en ningún momento se apiadou do rival. Seguiron xogando como se lles fora a vida en cada bola. George Karl está encantado do xogo do seu equipo. O grupo de díscolos e talñentosos xogadores dos que dispón, mais Chauncey Billups, están entregados e non se poñen ningún límite de cara ao futuro. Augúranse unhas fascinantes semifinais de conferencia ante os Dallas Mavericks, inda que antes os Nuggets non deberan esquecer que malia a humillación histórica que lles infrinxiron aos Horntes, inda queda por gañar un partido. Haberá que ver se aos Hornets inda lles queda un mínimo orgullo para reparar a súa maltreita imaxe no Pepsi Center da cidade de Colorado. (Xogador do partido: Carmelo Anthony)

Os Mavs a un paso das semifinais de Conferencia. Os Dallas Mavericks gañaron (90-99) por segunda vez na súa cancha e están a piques de consumar a primeira sorpresa- se é que así se lle pode chamar- da primeira rolda dos play offs. Ao contrario que nas anteriores vitorias nesta serie, os Mavericks non tiveron necesidade de parar a Tony Parker. O francés estivo xenial. Fixo nada menos que 43 puntos, (31 no primeiro tempo, no que é un record da franquía en playoffs), pero non foi suficiente, nin sequera coa axuda de Tim Duncan, que estivo moi ben e anotou 25 puntos e 10 rebotes. O xogo dos Spurs dependeu tanto das súas dúas estrelas que se fixo previsible. Entre Parker e Duncan anotaron 68 dos 90 puntos do seu equipo. Dallas, en cambio, foi un equipo. Destacou especialmente Jason Kidd, que no play off non se reserva como noutros partidos da Liga Regular. Fixo 17 puntos, 7 rebotes e 7 asistencias. Xenial estivo tamén Josh Howard, máximo anotador do seu equipo con 28 puntos, a maioría deles no segundo tempo do partido. Nowitzki non foi o home decisivo pero soubo facer un traballo suxo a favor do equipo (12 puntos e 13 rebotes). Barea, Terry, Wright e Dampier completaron tamén unha boa actuación e destacou o excelente traballo defensivo de Ryan Hollins, que acabou xogando 20 minutos e por momentos foi quen de pararlle os pés a tim Duncan. A serie volve ao AT&T Center de Santo Antonio e haberá que ver como responden os Spurs a esta situación límite. (Xogador do partido: Jason Kidd)

Os Lakers afastaron calquera dúbida que puidera aparecer tras o terceiro partido cunha vitoria contundente (108-94). Kobe Bryant estivo xenial e foise ata os 38 puntos cun excelente 16 de 24 en tiros de campo. O de Pennsylvania foi o líder dos Lakers nun segundo cuarto no que marcaron un parcial de 40-28. A incapacidade defensiva para parar a máquina de baloncesto de Phil Jackson acabou coas aspiracións dos Utah Jazz, cada vez máis dependentes de dous homes: Deron Williams (23 puntos e 13 asistencias) e Carlos Boozer (23 puntos e 16 rebotes). Nos Lakers, pola contra, ademais de Bryant apareceron os secundarios de luxo (Gasol e Odom), e sobre todo os reservas, como Walton, Vujacic ou Shannon Brown achegaron o suficiente para marcar a diferencia entre os dous equipos. De volta ao Staples, a serie parece máis que decidida. (Xogador do partido: Kobe Bryant)

Os Bulls gañan (118-121) despois de dúas prórrogas. Está a ser, sen dúbida a grande serie destes playoffs. Un equipo novo e alegre contra uns Celtics maduros de máis. Ademais, ofrece un espectacular duelo entre bases de gran futuro: o mellor rookie do ano, Derrick Rose e Rajon Rondo, que asinou o seu segundo triple doble consecutivo (25-11-11). Rose quedou a unha asistencia de conseguilo (23-11-9). No seu debe sete bolas perdidas mais no seu favor cómpre dicir que anotou 13 dos seus 23 puntos no último cuarto. (Xogador do partido: Derrick Rose)

Os Cavs, primeiros en pasar a semifinais de Conferencia (99-78). Era visto. Os Pistons non foron rival en ningún momento da serie para os Cavs e rematan unha das máis tristes campañas da súa historia recente. Rasheed e Iverson probablemente abandonen o equipo polo que é o momento de pensar seriamente na renovación dun plantel glorioso noutros tempos. Mais estes tempos son para os Cavs, que teñen en Lebron un líder famento de gloria. Onte fixo 36 puntos, 13 rebotes e 8 asistencias ademais de un notable 16 de 17 nun dos peros do seu xogo: os tiros libres. Lebron, ademais, non está so. Ilgauskas, Williams, West e compañía completan un plantel que é gran favorito para o título. Polo momento, foron os máis aplicados e contarán, xa que logo, con máis días de descanso. (Xogador do partido: Lebron James)

Turkoglu dalle a vitoria a Orlando cun triple no último segundo (84-81). Xa van máis de media ducia de partidos que os Sixers perden este ano cunha canastra no último segundo. Onte tocoulle a Turkoglu acabar coa esperanza de Philadelphia de forzar a prórroga. O turco, con esta canastra importantísima, resárcese dos seus pésimos tres primeiros partidos. Dwight Howard con 18 puntos e 18 rebotes dominou o xogo interior. Nos Sixers, Iguodala deu a cara en todo momento (13 puntos, 7 rebotes e 11 asistencias) e liderou un novo intento de remontada do seu equipo (como é habitual tivo que remar contra o marcador a maior parte do tempo), pero Miller non tivo o seu día máis afortunado e precipitouse en moitos momentos do xogo. A súa porcentaxe de acertos e tiros de campo estivo acorde coa pésima porcentaxe do equipo (38,8). A serie volve a Florida con vantaxe para os Magic, que seguen sendo os favoritos, se ben os Sixers xa demostraron que teñen calidade abonda para lles dar moita guerra. (Xogador do partido: Hedo Turkoglu)

Os Rockets a un paso das semifinais. Houston venceu (88-89) por segunda vez consecutiva. Outra vez cun marcador axustado mais demostrando maior calidade e veteranía nos momentos decisivos. A estas alturas, o equipo de Nick Adelman parece o único capaz de poñerlle as cousas algo difíciles aos Lakers no Oeste. Yao Ming (21 puntos e 12 rebotes) e Luis Scola (19-10) foron os máis destacados dos Rockets, onde tamén destacou Battier con 4 triples de 6 intentos. Peor estivo Artest, que tirou todo canto lle caía na man e fixo un pobre 5 de 20 en tiros de campo. Brandon Roy foi o mellor anotador do seu equipo con 31 puntos. A diferencia do terceiro partido, a participación dun anotador como Rudy Fernández foi máis ben testimonial con cinco tristes puntos. A serie volve a Texas e todo parece que está pronta a resolverse. (Xogador do partido: Yao Ming)

Os Hawks recuperan o factor cancha. Outra eliminatoria que denota a igualdade na Conferencia Leste, salvando a superioridade manifesta dos Cavaliers. O equipo de Atlanta recuperou o factor cancha ante Miami Heat tras vencer (81-71) con relativa comodidade no cuarto partido. O equipo de Mike Woodson soubo conter a Dwyane Wade, que quedou por debaixo dos seus números habituais (22 puntos, 6 rebotes e 7 asistencias). En Miami, ademais de Wade, só dous xogadores alcanzaron os dobles díxitos de anotación: O´Neal e Jones. Nos Hawks, pola contra, fixérono seis xogadores, destacando o partido do xeorxiano Zaza Pachulia, con 12 puntos e 18 rebotes. (Xogador do partido: Zaza Pachulia)

(Foto da web da NBA)

BAREA: O PROTAGONISTA INESPERADO

Barea volveu secar a Parker. As carencias de San Antonio Spurs volveron relucir no terceiro partido ante Dallas Mavericks, no que conseguiron a anotación máis baixa da súa historia en play offs (67-88). Como no primeiro partido, J.J. Barea foi fundamental para parar a Tony Parker (máximo anotador do seu equipo con apenas 12 puntos) e está a ser o home da serie. Dirk Nowitzki quedou en 20 puntos, outra vez por debaixo dos seus promedios da Liga Regular, pero afinou notablemente a puntería cun 8 de 12 en tiros de campo. Popovich, que gabou a defensa de Barea sobre o seu xogador estrela, administrou ao máximo os esforzos do seu plantel: utilizou 12 xogadores (ningún xogou máis de 25 minutos u menos de 15) pero non poderá escatimar demasiado no vindeiro partido pois unha nova derrota sería unha ameaza realmente seria para un equipo para o que sería un fracaso quedar eliminado tan cedo. (Xogador do partido: Jose Juán Barea).
Clara vitoria dos Celtics (107-86).Despois do sufrimento acumulado nos dous primeiros partidos da serie disputados en Boston, os Celtics chegaron ao United Center de Chicago dispostos a impór a súa xerarquía. Os Chicago Bulls son un equipo talentoso que pode amargarlle un partido a calquera, pero as súas estrelas son aínda demasiado novas e non teñen a regularidade suficiente para competir ante un grande como Boston. Paul Pierce foi o máximo anotador con 24 puntos pero un partido máis erixiuse como xogador determinante dos de Massachusets o base Rajon Rondo (20 puntos, 11 rebotes e máximo reboteador do equipo e 6 asistencias ademais dunha gran defensa sobre Derrick Rose). Boston pode sentenciar a serie se volve demostrar a mesma superioridade no vindeiro partido, tamén na cancha dos Bulls. (Xogador do partido: Rajon Rondo)
Os Jazz aproveitan a relaxación dos Lakers. Os Lakers perderon (86-88) un partido que dominaban con relativa comodidade no terceiro cuarto, cunha vantaxe de 13 puntos.Como como xa é habitual, relaxáronse en exceso e acabáronlle concedendo opcións de vitoria a un rival que desta volta non as desaproveitou ante a intensidade e paixón do seu público. Os Jazz acabaron impoñéndose grazas a unha canastra a falta de dous segundos de Deron Williams, nun partido no que demostraron unha gran superioridade no rebote (55 por 40 dos Lakers).Espectacular nesta faceta estivo Carlos Boozer, que colleu 22, ademais de anotar 23 puntos, o que delata un pobre partido en defensa de Pau Gasol. Nos Lakers, moi desacertados no tiro, destacou Lamar Odom con 21 puntos e 14 rebotes. Malia todas as facilidades que hoxe concederon os Lakers, aos Jazz custoulles unha barbaridade gañar o partido, polo que pensar nunha sorpresa ao remate da serie é realmente unha quimera. (Xogador do partido: Carlos Boozer)

Os Cavs superiores tamén en Detroit. Ata agora o equipo que demostrou maior superioridade na súa serie con respecto ao seu rival fora Cleveland ante os Pistons. Quedaba por ver que acontecía lonxe de The Q, mais no Auburn a historia non mudou en exceso (79-68). Lebron James demostrouse abondo para marcar a diferencia con respecto a un equipo triste, apático e decadente. Se os de Michael Curry, ben en defensa, foron capaces de manterse no partido durante tres cuartos, no último a grande estrela da Liga tomou o mando e anotou 11 puntos decisivos no parcial de 18-2 que decidiu o partido. Os números de James, coma sempre, rozaron o triple doble (25 puntos, 11 rebotes e 9 asistencias). Onte secundouno ben Joe Smith con 19 puntos e 10 rebotes. (Xogador do partido: Lebron James)

Importantísima vitoria dos Sixers no Wachovia Center. Unha canastra a falta de dous segundos de Thaddeus Young deulle a vitoria (94-96) aos Sixers no primeiro partido da serie en Philadelphia. O equipo de DiLeo ponse por diante na eliminatoria e demostra unha vez máis que ten equipo abondo para lle plantar cara a uns Orlando Magic demasiado irregulares. Por vez primeira na serie destacou Dwight Howard, que estivo nos seus números: 36 puntos e 11 rebotes. Mais o resto do equipo de Florida tivo moitos problemas para superar a intensa defensa dos Sixers ao longo do partido. Apenas Rafer Alston parecía ter capacidade para facerse sitio na mesta arañeira preparada por Di Leo. No equipo de Philadelphia, como sempre, os máis destacados foron Miller e Iguodala, que enn ningún momento lle perderon a cara o partido. O base fixo24 puntos, 9 rebotes e 7 asistencias. O escolta 27 puntos, 7 rebotes e 4 asistencias. Iggy anotou en momentos decisivos, pero como no primeiro partido a piques estivo de estragra a súa boa actuación despois de errar dous tiros libres nun momento crucial. Por fortuna, apareceu na última xogada do partido Thaddeus Young, que estivera especialmente discreto (anotou apenas seis puntos), para selar a vitoria. Orlando está agora coa corda no pescozo. No caso de perder o segundo partido en Philadelphia chegaría cunha presión insoportable ao Amway Arena. (Xogador do partido: Andre Iguodala)

Os Rockets gañaron (83-86) o primeiro partido no Toyota Center polo que manteñen vantaxe na serie. Como era de prever, non foi sen traballo malia que fosen un chisco superiores aos Blazers ao longo do partido. Os texanos dominaron o marcador dende o inicio grazas, sobre todo, ao acerto atacante de Scola e Carl Landry, que machacaron a un fraco Lamarcus Aldridge en defensa. O propio Aldridge tampouco andaba demasiado  fino na canastra contraria, ao igual que o resto dos seus compañeiros, especialmente Brandon Roy, cunhas porcentaxes de acerto realmente baixas por mor de forzar en exceso ante a dura defensa que lle preparou Adelman. Apenas Rudy Fernández dende a liña de tres impediu que o seu equipo perdese opcións no partido no primeiro tempo. Pola contra, os Blazers defenderon moi ben a Yao Ming. No segundo tempo, os Rockets tiveron máis dificultades en ataque, con Scola con problemas de faltas. Portland reaxiu de vagar, Roy afinou a puntería e Fernández seguía aparecendo nos momentos decisivos, mais contra o final, valeu a experiencia dos Rockets para gañar por tres escasos puntos. Destacou o partido de Luis Scola con 19 puntos e 9 rebotes. (Xogador do partido: Luis Scola) 

New Orleans Hornets respira. Despois de saír escaldado dos dous partidos en Denver, o equipo de Byron Scott recuperouse na súa cancha cunha vitoria agónica (93-95) despois dun partido moi disputado, mesmo violento por momentos. Da batalla saíu vitorioso Chris Paul, que asinou 32 puntos e 12 asistencias. Tamén foi importante a achega de David West (19 puntos e 9 rebotes) e, sobre todo, de Rasual Butler (17 puntos e 3 de 4 dende a liña de 3). Nos Nuggets, Carmelo foi o maximo anotador con 25 puntos, mentres que Chauncey Billups estivo por debaixo dos números dos dous primeiros partidos. Os Nuggets tentarán no cuarto volver a Colorado con, cando menos unha vitoria en cancha allea (Xogador do partido: Chris Paul)

Os Heat póñense moi rufos. Despois do pésimo partido dos Heat o primeiro día, poucos pensaban que, habida conta a inexperiencia da meirande parte do seu plantel, se recuperarían tan axiña e tan ben. Pero despois da contundente vitoria (78-107) de hoxe en Miami ante os Hawks, que pon a serie a favor do equipo de Spoelstra por 2-1, as principais dúbidas enxergan cara Atlanta, que hoxe regalou o partido cunha pésima serie de 17 de 19 de tiros de campo no inicio do mesmo e que permitiu un 29-50 ao descanso que logo foi insuperable para os de Mike Woodson. Dwyane Wade foi o mellor de Miami con 29 puntos, 8 asistencias e 7 rebotes.  Outro veterano, Jermaine O´Neal achegou 22 puntos e 10 rebotes. En Atlanta, apenas se pode destacar algunha actuación individual. (Xogador do partido: Dwyane Wade)

(Foto da web da NBA)

ALLEN DALLES VIDA AOS CELTICS

Ray Allen salva os Celtics no último suspiro. Ray Allen resarciuse do seu pésimo primeiro partido no que apenas anotou catro puntos e foi o home fundamental na vitoria agónica (115-118) dos Celtics ante os Bulls. Os de Chicago a piques estiveron de dar a sorpresa por segunda noite consecutiva, o que lle tería posto as cousas moi complicadas ao equipo de 'Doc Rivers', grazas a unha grandísima actuación de Ben Gordon (42 puntos). Porén, emerxeu a figura de Ray Allen que anotou dous triples nos últimos segundos de partido, o último a falta de dous segundos que evitou a prórroga. Desta volta Derrick Rose, a diferencia do sábado, tivo unha actuación máis ben discreta. Os Celtics apenas tiraron do banco e toda a responsabilidade recaeu no quinteto titular. Alén de Ray Allen, destacaron Rajon Rondo, cun triple doble (19 puntos, 16 asistencias e 12 rebotes), Kendrick Perkins (16 puntos e 12 rebotes), e Glen Davis (26 puntos e 9 rebotes). Pierce, en cambio, volveu ter unha actuación por debaixo dos seus números. Despois dos dous grandes partidos dos Bulls no Garden, haberá que ver de que son capaces na súa propia cancha. Se os Celtics non son capaces de gañar un dos dous vindeiros partidos no United van pasalo francamente mal. (Xogador do partido: Ray Allen).

Inconmensurable Tony Parker. O base francés, que fora anulado no segundo tempo do primeiro partido por José Juan Barea, foi o home determinante na vitoria incontestable (84-105)dos Spurs que iguala 1-1 a eliminatoria. Parker anotou 38 puntos, e deu 8 asistencias, pero no primeiro tempo xa sumara 27 e rompera definitivamente o partido. Os Mavericks non puideron frear a enxurrada de xogo do francés. Sen chegar a perderlle de todo a cara ao partido, os Mavs foron inferiores e Nowitzki volveu facer un partido moi discreto (14 puntos e un pobre 3 de 14 en tiros de campo). Moito mellor estivo Jason Kidd, atrevido e acertado no tiro exterior. A eliminatoria viaxa a Dallas. Despois do visto onte, parece que Popovich non está disposto a concederlle máis facilidades aos homes de Carlisle. (Xogador do partido: Tony Parker).

Imparables Cavaliers. Os Cleveland Cavaliers sumaron a súa segunda vitoria (82-94) consecutiva ante os Pistons e, sobre todo, demostraron a súa tremenda superioridade. O partido foi un baño, cuns Cavaliers soberbios liderados por un Lebron aínda máis soberbio que non tiveron piedade dos Pistons. O único pero para Mike Brown, o frouxo rendemento dos seus reservas no último cuarto, no que a piques estiveron de complicarse despois de partir dunha vantaxe de 29 puntos. Lebron tivo que voltar á cancha para poñer as cousas no seu sitio. Os Pistons pasaron inadvertidos e parecen asumir que pouco lles queda por facer esta temporada. (Xogador do partido: Lebron James).

Roy lidera aos Blazers. Barndon Roy erixiuse en líder dos Blazers para conseguir a fundamental vitoria (103-107) sobre Houston que iguala a eliminatoria. Anotou nada menos que 42 puntos, fundamentais para se impoñer ao correúdo e competitivo equipo de Adelman. Escoltouno perfectamente Lamarcus Aldridge (27 puntos e 12 rebotes), mentes que Pryzbilla e Oden axustaron moito mellor a súa defensa sobre Yao, que fixera estragos no primeiro partido. O máximo anotador de Houston foi Aaron Brooks con 23 puntos. Como era de prever, enxérgase un dos cruces máis igualados e apaixonantes dos playoffs. Por desgraza, Dikembe Mutombo lesinouse nun xeonllo e posiblemente disputou onte os últimos minutos da súa brillante carreira.(Xogador do partido: Brandon Roy).

Vitoria requena dos Lakers. Os Lakers gañaron (109-119) pero non convenceron demasiado no seu segundo partido no Staples ante os Jazz. Nunca acabaron de dominar o partido inda que no seu defecto hai que dicir que sempre que achuchaba o equipo de Sloan no marcador, anotaban algunha canastra que confirmaba a súa superioridade. Ademais estiveron moi acertados de cara a canastra cun meritorio 60% de acerto en tiros de campo. Nos Jazz destacaron Deron Williams (35 puntos e 9 asistencias) e Boozer (20 puntos e 10 rebotes), pero a estas alturas non parece abondo para complicarlle a vida aos Lakers. Haberá que ver se cando menos recuperan a súa histórica fiablidade no Energysolutions, posta en cuestión no último treito da Liga Regular. Phil Jackson pasa á historia ao converterse no técnico con máis vitorias en playoffs: 195. (Xogador do partido: Kobe Bryant).

Os Sixers desaproveitaron a oportunidade do 2-0. Pódense arrepentir moito os Philadelphia 76ers de non ter gañado (87-96) o segundo partido no Amway Arena de Orlando ante uns Magic que poucas veces serán tan vulnerables. Os Sixers conseguiron, por segundo día consecutivo, parar a Dwight Howard (11 puntos e 10 rebotes), mesmo desesperalo (foi eliminado por seis faltas mediado o último cuarto). Tampouco permitiron o acerto no tiro dos homes exteriores (6 de 23 en triples e un discreto 43% en tiros de campo). Pero todo ese traballo non valeu de nada pois en cancha contraria os de DiLeo perderon ata 16 bolas e cometeron unha chea de precipitacións que impediron facer dano cando o partido estaba máis de cara. Un gran problema é que o potencial ofensivo dos Sixers redúcese en exclusiva a tres homes: Miller, Iguodala e Young, que onte anotaron 71 dos 87 puntos do equipo. Andre Miller estivo soberbio, sobre todo no primeiro tempo e foi o máximo anotador do partido (30 puntos). Polos Magic, ante a mediocridade xeral, brillou o rookie Courtney Lee que desatascou a empanada mental dos seus compañeiros. A serie viaxa agora a Philadelphia, onde os Sixers deberán manter a súa vantaxe despois da vitoria no primeiro partido. (Xogador do partido: Courtney Lee)

Reacciona Miami grazas a Wade. Os Miami Heat sorprenderon aos Hawks (108-93) , talvez confiantes de máis despois das facilidades do primeiro partido. Dwyane Wade asumiu o mando e no primeiro tempo xa colaborara nun parcial suficiente para non sufrir demasiado o resto do partido (ao final sumou 33 puntos). Canda el, tamén tivo o día o gañador do concurso de triples: Daequan Cook, con 20 puntos e un magnífico 6 de 9 dende máis alá dos 7,25. Atlanta debe reaxir pois perde o factor cancha. Onte, a diferencia do primeiro día, saíu con pouca intensidade e cando se deu conta, Wade xa orientara a eliminatoria cara Florida. (Xogador do partido: Dwyane Wade).

Billups lidera outravolta a vitoria dos Nuggets (93-108). Chauncey Billups está a ser un dos grandes nomes propios desta primeira ronda de playoffs. Suma 67 puntos entre os dous partidos (31 esta madrugada), e é o gran líder duns Nuggets imparables. Os Hornets están a pasar pola postemporada sen pena nin gloria, e mesmo Chris Paul e David West están moi por debaixo do seu rendemento habitual. Onte a mellor nova para o equipo de Byron Scott foi o acerto nos triples de Stojakovic e Rasual Butler (4 de 5 cada un). (Xogador do partido: Chauncey Billups).

(Foto da web da NBA)

PRIMEIRAS SORPRESAS

Comezaron os play offs cun auténtico sorpresón.

Os Bulls venceron (105-103) aos Celtics en Boston despois dunha prórroga e dun partido memorable de Derrick Rose, que igualou a marca histórica de puntos nun debut en playoffs de Karem Abdul-Jabbar (36 puntos). Ademais deu 11 asistencias e apañou 4 rebotes. Os Celtics acusaron en exceso a baixa de Kevin Garnett e non puido cos homes altos de Vinnie Del Negro. Especialmente espectacular estivo Joakim Noah, con 17 rebotes. O veterano Brad Miller dende o banco colaborou con outros doce. Ademais, non tiveron o seu día os outros dous piares do big three. Pierce, moi ben defendido durante todo o partido, quedou nuns modestos 23 puntos e errou un tiro libre decisivo para evitar a prórroga, mentres que Ray Allen só sumou catro puntos (1 de 12 en tiros de campo) en corenta minutos. Apenas Rajon Rondo deu a cara polos de Boston con 29 puntos, 9 rebotes e 7 asistencias. Os peores prognósticos para os de Massachussets comezan a coller trazas despois do primeiro choque e agora están obrigados a gañar cando menos un partido no United Center. Queda por ver se Derrick Rose, alén de facer un debut alucinante é capaz de completar unha elimintoria alucinante. (Xogador do Partido: Derrick Rose)
Os Cavaliers non deron opcións a Detroit. Lebron James non quixo agardar para demostrar que é o gran líder dun dos grandes favoritos para o título. Coa súa contribución (38 puntos, 8 rebotes e 7 asistencias) marcou a diferencia con respecto a uns Pistons que só resistiron ata mediado o terceiro cuarto. Ao final a máquina dos Cavs comezou a furar ata deixar a vantaxe final en 18 puntos (84-102). Canda James destacaron os 12 puntos e 10 rebotes de Ilgauskas. Nos Pistons, apenas Stuckey chegou aos 20 puntos. No anecdótico dicir que Lebron, alén do seu partido deixou unha xogada para a lembranza e que cuestiona a súa condición humana. Pechou o segundo cuarto cunha canastra dende medio campo que deixou estupefacta á torcida de The Q. (Xogador do partido: Lebron James)

Dallas tamén sorprende. O de Dallas tamén foi sorprendente. Gañaron (105-97) e convenceron na cancha dos San Antonio Spurs. Non necesitaron ademais dun partido extraordinario de Dirk Nowitzki (19 puntos e 8 rebotes). Os Mavericks fixeron un partido magnífico, defendendo cunha intensidade descoñecida. O portorriqueño Barea estivo inmenso no segund tempo parando e desesperando a un perplexo Tony Parker. Apenas as canastras a táboa de Duncan e as triples de Finley e Mason (10 de 13 en tiros de tres para os Spurs) impediron que os Mavs pechasen o partido moito antes. Ademais de Barea cómpre salientar o gran partido de Josh Howard (25 puntos). (Xogador do partido: José Juan Barea)

Yao Ming impuxo o seu poderío. Baixón no Rose Garden despois da contundente vitoria (108-81) dos Rockets ante Portland. O gran protagonista foi Yao Ming, ao que foron incapaces de parar os pívots dos Blazers: Pryzbilla primeiro e Oden despois. O chinés, con 24 puntos con pleno de acertos en tiros de campo (9 de 9) e tiros libres (6 de 6), e 9 rebotes, foi o líder do seu equipo á hora de deixar pechado o partido xa no primeiro tempo (62-44). Nick Adelman administrou perfectamente os tempos dos seus homes, ata 12 xogadores participaron activamente na rotación, e conseguiu un magnífico 58% de acerto en tiros de campo. Aaron Brooks foi o máximo anotador do seu equipo con 27 puntos (5 de 8 en triples). Os Blazers terán que mellorar moito primeiro para parar a Yao nos días vindeiros e logo para mellorar as súas prestacións ofensivas ante uns Rockets moi serios en defensa. Só dous xogadores do equipo de McMillan superaron os 10 puntos de anotación: Brandon Roy (21) e Greg Oden (15). (Xogador do partido: Yao Ming)

Os Lakers sen problemas. O equipo de Phil Jackson demostrou no primeiro partido de play offs que poucas concesións está disposto a darlle aos seus rivais (100-113). Saiu dominador ante os Jazz e xa no descanso gañaba de 22. A diferencia doutras ocasións na Liga Regular, non se despistou e soubo administrar con intelixencia a súa vantaxe no marcador. Destacou o gran partido de Trevor Ariza en defensa e en ataque (21 puntos). Os Jazz moito terán que mellorar se pretenden gañar algún partido no Staples. Os mellores, como non, Deron Williams (16 puntos e 17 asistencias) e Carlos Boozer (27 puntos e 9 rebotes). (Xogador do partido: Trevor Ariza)

Os Sixers gañan tras unha gran remontada no último cuarto. Philadelphia deu un gran paso adiante nas súas aspiracións de dar a sorpresa na súa eliminatoria ante os Magic. Gañaron (100-98) grazas a unha canastra de Iguodala a falta de dous segundos un partido que perdían de 18 contra o final do terceiro cuarto. Dwight Howard non escatimou o seu poderío baixo os aros: 31 puntos e 16 rebotes, pero non o acompañaron os tiradores, cun pobre 5 de 18 en tiros de tres. Os Sixers, pola contra estiveron moito máis acertados cun 51,2 en tiros de campo e 7 de 12 en triples, destacando nesta faceta, como sempre acontece nos partidos importantes, o veterano Donyell Marshall que anotou tres triples no último cuarto. Andre Iguodala foi o mellor do seu equipo con 20 puntos, 8 rebotes e 8 asistencias, Miller fixo un 15-7-7 e Louis Williams dende o banco achegou 18 puntiños. Os Sixers, como o ano pasado, volven ofrecer a súa mellor versión ao comezo dos play offs. (Xogador do partido: Andre Iguodala)

Batacazo dos Heat. Atlanta Hawks foi inmisericorde con Miami (64-90). Saíron superenchufados de inicio, cunha intensidade defensiva encomiable e anularon por completo o xogo de Miami, no que nin sequera Dwyane Wade atopaba o camiño da canastra. O segundo cuarto, cun 18-35 a favor dos de Georgia, acabou definitivamente co partido. Seis homes dos Hawks superaron os 10 puntos de anotación mentres que en Miami só o conseguiron dous: Beasley fixo 10 pelados e Wade quedou en 19, cando fixera máis de 20 nas súas últimas doce aparicións en playoffs. Miami pagou a súa inexperiencia e corre o risco de que cando se dea conta da esixencia da postemporada sexa demasiado tarde. Os Hawks tiñan moi claro o que estaban xogando. (Xogador do partido: Josh Smith)

Pobres Hornets. Nuggets e Hornets confirmaron no primeiro partido dos playoffs a imaxe que viñan dando nos últimos partidos de Liga Regular. Os Denver Nuggets son unha máquina de facer baloncesto no que o talento individual acabou confluíndo nun proxecto consistente de equipo, grazas en boa medida ao papel de Chauncey Billups, que fixo un partidazo con 36 puntos e 8 rebotes. Os Hornets, pola contra, son un equipo que cada vez máis parece depender en exclusiva da calidade de Chris Paul e David West. Inda por riba, nin o un nin o outro tiveron un partido especialmente afortunado polo que non é de estrañar o avultado marcador final (84-113). (Xogador do partido: Chauncey Billups) (Foto da web da NBA)

CHEGAN OS PLAYOFFS

A madrugada do venres rematou a Liga Regular polo que xa están configurados os play offs. Son os seguintes:

Na Conferencia Leste: Cleveland Cavaliers-Detroit Pistons. Os Cavs perderon sorprendentemente o último partido ante os Sixers (111-110). Deste xeito chafóuselles o a mellor marca histórica na propia cancha. Todo sexa dito, Mike Brown deulle descanso a Lebron, Mo Williams e Zydrunas Ilgauskas. Os reservas deron guerra e forzaron unha prórroga despois de ir perdendo de 12 puntos no descanso. Na última xogada Gibson escorregou e non puido xogarse a canastra decisiva. Os Sixers, que viñan de perder sete partidos seguidos, conseguiron deste xeito o sexto posto, que parecía perdido. Pola súa banda, os Pistons perderon en Miami (96-102) nun partido no que descansaron Hamilton e McDyess. Polos Heat tampouco xogou Dwyane Wade. Os Pistons, un clásico en franca decadencia e que esta temporada perdeu o auténtico levedo do seu xogo colectivo: Chauncey Billups, que marchou por Iverson, que non xogará nos playoffs, parecen rival pequeno para uns Cavaliers que son favoritos para o anel e moi fortes na súa cancha. Un 4-0 ou 4-1 parece o resultado máis probable.

Boston Celtics-Chicago Bulls: Os de Chicago fixeron un último treito de Liga regular espectacular se ben perderon o mércores cos Raptors (109-98) no United Center perdendo o sexto posto que foi para os Sixers. Neste partido, o base dos canadenses José Manuel Calderón bateu a mellor marca histórica de tiros libres: 151 de 154. Os Celtics, que lle deron descanso a Paul Pierce e Ray Allen, non tiveron problemas para superar (107-115) os Wizards nun bo partido de Leon Powe (18 puntos e 13 rebotes). A eliminatoria é das máis interesantes por canto os campións andan co seu potencial mermado, sobre todo polos problemas físicos de Kevin Garnett, cuxo estado para os playoffs é unha incógnita. Os Bulls, pola contra, son un conxunto en progresión, moi novos aínda pero con capacidade para complicarlles as cousas aos de Boston. Derrick Rose, probablemete mellor rookie da temporada, pode atopar ante os Celtics a oportunidade de reivindicarse como líder do seu equipo. Con todo, os favoritos seguen sendo os Celtics e aventuramos un 4-2.

Orlando Magic-Philadelphia 76ers: Orlando gañou facilmente o seu último compromiso ante os Bobcats (73-98). Porén, nas últimas semanas baixou o seu rendemento. Os Sixers, despois dunha negativa xeira de resultados, profanaron sorprendentemente The Q e eludiron o sétimo posto. Os Magic son, evidentemente favoritos. Contan con Dwigh Howard, o pívot máis determinante da Liga, e un conxunto arredor del de grandes tiradores que aproveitan as defensas sobre a súa estrela. Os Sixers, pola contra, son un equipo de características radicalmente diferentes. Pouco fortes baixo os aros e sen grandes tiradores, dependen da velocidade no seu xogo e do talento de Iguodala, Miller e Thaddeus Young. Terán que afinar moito en defensa, que brillen as estrelas do equipo, aproveitar a profundidade do banco e que Thaddeus non terá en frente pívots superiores fisicamente a el. Ademais, en Orlando, Turkoglu e Rashad Lewis andan algo tocados. Haberá que ver se Alston e Courtney Lee son capaces de ofrecer un rendemento semellante, cando menos, ao da Liga Regular. Outra clave será a defensa do irregular Dalembert sobre Howard. Inda que a lóxica di que pasará Orlando, apstaremos co corazón pola clasificación dos Sixers a sete partidos.

Atlanta Hawks-Miami Heat: Dous equipos aínda en progresión. Os Hawks perderon o seu último partido en Memphis (90-98) reservando o seu quinteto titular (apenas Smith xogou nove minutos). Os Heat, como dixemos, gañáronlles aos Pistons. Miami, malia a notable progresión de xente nova como Beasley, Chalmers ou Cook, seguen a depender basicamente do inconmesurable talento de Dwyane Wade. Adoecen ademais de xogo interior, malia a recente chegada de Jermaine O´Neal, por debaixo en todo caso das expectativas. Atlanta parece un equipo máis completo e equilibrado, non sobrado de banco, mais moito máis descansado pois asegurou a cuarta praza fai xa moito tempo. Aventuramos un 4-2 para Atlanta.

No Oeste os cruces son, Los Angeles Lakers-Utah Jazz: Dous equipos que descansaron na última xornada, o día despois de que os anxelinos superaran precisamente aos Jazz nun aperitivo dos sete partidos que agardan. Os Lakers, claro está, son os grandes favoritos. Dominaron con facilidade a súa competitiva conferencia. Pau Gasol chega mellor que nunca, mentres que Kobe, relaxado nas últimas semanas, afronta os playoffs famento de acadar o seu primeiro anel sen Shaquille ao seu carón. Andy Bynum, despois da súa lesión de xeonllo parece estar en boas condicións para a postemporada, na que ten que ser unha peza fundamental, do mesmo xeito que Lamar Odom como sexto home. Con todo, terán en frente un dos peores rivais posibles: os Utah Jazz, un dos mellores planteis da Liga, cargado de estrelas e cun técnico que non admite relaxacións. Por iso chama a atención o pésimo final de Liga dos de Salt Lake City, no que desprezaron algúns dos seus principais sinais de identidade, como a intensidade no xogo e a fortaleza na súa cancha. Non parece que Sloan estea disposto a admitir tal actitude a partid do sábado. Ademais os xogadores non poden ter maior estímulo que enfrontarse aos Lakers. con todo, o noso prognóstico é de 4-2 para os Lakers.

Denver Nuggets-New Orleans Hornets. Os Nuggets de George Karl veñen de culminar unha das mellores Ligas Regulares da súa Historia. A sabedoría do adestrador e a intelixencia na cancha dun base como Billups, serviron para sacar o mellor dun grupo de xogadores tan díscolos como talentosos. Onte, porén, perderon e ben no Rose Garden (76-104) ante Portland. Os Hornets, que perderon o último partido (98-105) ante San Antonio despois dunha prórroga, acaban o ano por debaixo das expectativas e plantexan serias dúbidas sobre as súas verdadeiras aspiracións, pois á hora da verdade dependen en exceso do talento de Chris Paul e David West. Poderanse ver grandes partidos e apostamos por un 4-3 para os Nuggets.

San Antonio Spurs- Dallas Mavericks: Interesantísimo cruce entre equipos de auténticos veteranos. Os Spurs, como xa referimos acabaron cunha traballada vitoria ante os Hornets e Dallas gañou na súa cancha aos Rockets (95-84). Os Spurs son aínda hoxe un dos grandes favoritos para o título, un equipo hipercompetitivo e talentoso ao que este ano hai que sumar o bo rendemento de Finley e Mason e a aparición de Hill como recambio apañado para Parker. Con todo, conta co inconveniente da baixa de Ginóbili, o seu xogador máis decisivo. Os Mavericks tiveron unha campaña moi irregular. Apenas Nowitzki mantivo o seu nivel e Carlisle nunca soubo atopar o punto exacto. Os Spurs pasarán despois dun 4-1.

Portland Trail Blazers-Houston Rockets: Eliminatoria igualada e apaixoante. Os Blazers, que culminaron unha magnífica vitoria unha espectacular Liga Regular, están exultantes. Son un equipo novo e entusiasta, moi talentoso e cun adestrador esixente. A principal dúbida é o rendemento de Greg Oden como 5, se ben Joel Pryzbilla pode ser unha boa alternativa. Os Rockets, pola súa banda, teñen tamén moi boa pinta e non parece que vaia afectarlles en exceso a baixa de McGrady, máis ben o contrario. Para os de Adelman será especialmente importante que Kyle Lowry e Ron Artest ofrezan un bo rendemento a partir de agora. O prognóstico é difícil mais mollarémonos con un 4-3 para os Rockets. (A foto da web da NBA)

OS MELLORES DA LIGA REGULAR

Os Cleveland Cavaliers venceron (117-109) aos Indiana Pacers no Conseco Fieldhouse e certificaron que son o mellor equipo da Liga Regular. Na loita polo título contarán coa vantaxe do factor cancha en todas as eliminatorias, unha gran vantaxe tendo en conta cos de Mike Brown apenas perderon un partido (contra os Lakers) de 40 na súa cancha, o Quicken Loans Arena. Os Cavaliers, armados arredor de Lebron James, son un equipo moi consistente, de grande intensidade defensiva e variados recursos ofensivos, alén do talento incomparable da súa estrela. Onte, en Indianápolis, o cinco inical dos Cavs, con Varejao no lugar de Ben Wallace, deu un excelente rendemento no colectivo e no individual. Lebron James anotou 38 puntos, Zydrunas Ilgauskas 16 e 10 rebotes, Mo Williams, sen facer o seu mellor partido, fixo uns excelentes números (18 puntos, 8 asistencias e 6 rebotes), mentres que Delonte West, exclente defensor, é un home fundamental para levedar o xogo colectivo. Onte fixo un partido extraordinario con 20 puntos, 6 rebotes e 4 asistencias, procurando sempre a xogada máis intelixente e encarando con valentía o aro contrario. Anderson Varejão estivo inmenso baixo os aros e apañou 11 rebotes, 7 deles ofensivos. Xera máis dúbidas a segunda unidade, con Sczerbiak baixo de forma e Gibson aboado á irregularidade, mentres que nos homes altos, Smith, Jackson e Hickson cumpren pero non destacan especialmente. Onte os Cavaliers gañaron con relativa facilidade inda que os Pacers deron guerra e mantiveron opcións ata o final. Danny Granger (38 puntos) e Brandon Rush (27) acapararon a anotación, ben escoltados polo incombustible Troy Murphy (17 puntos e 13 rebotes). O rival dos Cavs nos cuartos de final da Conferencia, serán os veteranos Detroit Pistons, que onte podían ter evitado este cruce de gañárenlle aos Bulls no duelo directo que disputaban no Auburn Palace. Mais os de Michigan desaproveitaron (91-88) a vantaxe no marcador coa que contaron ao longo do partido e acabaron perdendo cos de Chicago, que están asinar un excelente treito final de Liga Regular e están a piques de relegar aos Sixers ao sétimo posto da Conferencia. É a duodécima vez que os Pistons perden un partido que lideraban ao remate do terceiro cuarto. Nos últimos doce minutos de onte encaixaron un parcial de 22-13 (con 11 puntos de Derrick Rose). O posible rival dos Bulls nos cuartos, de confirmarse o seu sexto posto, serán os Orlando Magic, que están a acabar tamén moi mal a Liga Regular. Onte perderon en Milwaukee por 80-98, inda que débese dicir que Van Gundy reservou por diversas molestias a Howard, Turkoglu e Rashad Lewis. Outros partidos entre equipos do Leste: Raptors-Wizards (97-96) e Bobcats-Nets (87-91) cun excelente Brook López que anotou 18 puntos e apañou 20 rebotes. No ‘salvaxe’ Oeste os Nuggets aférranse ao seu segundo posto despois de gañarlle 98-118 aos Kings nunha nova exhibición de J.R. Smith (45 puntos e 11 de 18 en triples). Os Rockets superaron a uns tristes Hornets que quedaron nun marcador lamentable (66-86) nun dos peores partidos que se lle lembra a Chris Paul. Os Spurs, con Popovich administrando ao máximo o seu plantel, gañaron en Oakland 101-72 aos Warriors. Os Jazz, que se preparan para recibir aos Lakers no play off gañaron sen dificultades aos Clippers (85-106) e os Blazers arrasaron ante Oklahoma (83-113). Os Dallas Mavericks tampouco erraron no seu partido, inda que suaron para derrotar aos Timberwolves. Foi necesaria unha inverosímil canasta de Jason Terry a falta de dúas décimas para poñer o 94-96 definitivo. Nun partido intrascendente os Suns gañáronlles (110-119) aos Memphis Grizzlies. (Foto da web dos Cavaliers)

OS CELTICS SAEN ESCALDADOS DE THE Q

Os Cavaliers impuxéronse en The Q por un espectacular 76-107 a uns Celtics que sen Garnett amosan todas as súas carencias e as dúbidas que suscitan de cara a revalidar o título. O equipo de Mike Brown marcou un parcial de 31-9 no primeiro cuarto e xa non houbo máis partido. Os Celtics saíron de Cleveland cunhas pobres porcentaxes de acerto e apenas 14 puntos de Pierce e 12 de Glen Davis. Cleveland, en cambio, anotouno case todo, incluído un 10 de 16 en triples. Lebron foi o máximo anotador do seu equipo con 29 puntos. Os Cavaliers están a completar a mellor temporada da súa historia, están a unha vitoria de rematar como os mellores da Liga Regular e, de gañarlle aos Sixers, baterían a mellor marca de vitorias na casa (40-1), desfacendo o empate que a estas alturas mantén cos Celtics da 1986-87. Non parece difícil que lle gañen a Philadelphia, que segue na súa pésima xeira de resultados. Sumou a súa quinta derrota consecutiva tras perder en Toronto (104-111). Andre Iguodala perdeu 10 balóns e Andre Miller fixo un pésimo 2 de 14 en tiros de campo. Deste xeito os Sixers perden toda posibilidade de acadar o quinto posto da Conferencia, que o asegurou Miami Heat despois de gañarlle 105-122 aos New York Knicks. Do mesmo xeito que Kobe Bryant e Lebron James, Dwyane Wade tamén superou os 50 puntos ante os de D´Antoni. Fixo 55 cun 19 de 30 en tiros de campo. Espectacular foi tamén o partido do rookie Michael Besaley, que saíu de inicio e anotou 28 puntos e apañou 16 rebotes. Os Heat xa saben que os Hawks serán o seu rival en play offs. Os Sixers, pola contra, inda non aseguraron o sexto posto. Despois de perder cinco partidos seguidos, e das catro vitorias consecutivas dos Bulls, os de Illinois teñen cerca desprazar os de DiLeo inda que, de todos os xeitos, tamén poderían verse oitavos se perden esta madrugada contra os Pistons. No Oeste, os Lakers gañáronlle facilmente (75-92) aos Grizzlies nun partido que a Phil Jackson valeulle para probar de cara o play off. Shannon Brown, chegado fai dous meses de Charlotte consolídase como segundo base e Bynum parece recuperado de cara a postemporada. Se non pasa nada raro, Utah Jazz será o primeiro atranco dos Lakers de cara o título. Nun duelo directo, os Hornets superaron (92-102) en Nova Orleans aos Dallas Mavericks nun partido no que Chris Paul anotou 31 puntos e deu 17 asistencias. Por último, os Spurs, reservóns a estas alturas do ano, gañaron (95-92) aos Kings grazas a un triple de Michael Finley no último segundo. Entre a madrugada de hoxe e a seguinte péchanse os partidos da Liga Regular polo que o xoves xa teremos a composición definitiva dos playoffs. (A foto da web da NBA)

YAO PUIDO CON HOWARD

O partido máis interesante da xornada na NBA xogábase no Toyota Center entre Houston Rockets e Orlando Magic. Enfrontábanse dous dos mellores equipos na competición, nun bo momento da temporada e, sobre todo, enfrontábanse dous dos homes altos máis determinantes da Liga: o chinés Yao Ming contra Dwight Howard. O de Orlando está a completar a súa mellor campaña en cinco anos na NBA. Yao, porén, está este ano por debaixo do seu mellor nivel. Mais os Rockets gañáronlles (83-93) aos Magic e Yao Ming superou a Dwight Howard no seu duelo persoal. Sumou 20 puntos e 16 rebotes por 13 puntos e 10 rebotes de ‘Superman’. Adelman recorreu a outro veterano, Dikembe Mutombo (que xogaba o seu sétimo partido da temporada), para darlle relevo a Yao na defensa de Howard. Á marxe deste duelo de altura, o partido, marcado polas defensas e o pouco acerto atacante nos dous bandos, dominouno de inicio Houston, que axiña se puxo por diante no marcador e non viu perigar apenas a vitoria. Os Sixers, pola súa banda, non acaban de acadar a regularidade necesaria e mantéñense a rebufo de Miami Heat na loita polo quinto posto da Conferencia. Perderon cos Bobcats (98-101) nun partido igualado que aos de DiLeo comezóuselles a escapar no primeiro tempo (49-63 ao descanso). Gerald Wallace (29 puntos e 11 rebotes) e Raymond Felton (32 puntos) foron os máis destacados do equipo de Charlotte e protagonizaron ademais, no último minuto, a xogada que pechou definitivamente o partido. Non aproveitaron, porén, a oportunidade os Heat que perderon na súa propia cancha ante os New Orleans Hornets (93-87) malia os 32 puntos de Wade e un gran partido de Beasley (25 puntos e 9 rebotes). Chris Paul rozou o triple doble con 26 puntos, 9 rebotes e 9 asistencias. Heat e Sixers están tan igualados que ata o remate da Liga Regular non se saberá quen se cruzará cos Hawks nos play offs. O equipo que dirixe Mike Woodson gañou en Toronto (118-110). Os Bulls seguen co seu bo final de temporada (sete vitorias nos dez últimos partidos) despois de impoñerse no United aos Knicks (103-110). A mellor nova para Del Negro foron os 25 puntos de Hinrich. Os Lakers superaron (122-104) sen problemas aos Kings nun partido que sentenciaron no segundo cuarto (40-18 de parcial) e que pasará á Historia polo insólito mate de Vujacic nos fuciños de Simmons e Francisco García. “Xa vin todo canto tiña que ver. Sasha machacando sobre alguén. Xa me podo retirar”, dixo irónico Kobe Bryant respecto a xogada do seu compañeiro. Tampouco tiveron problemas os Spurs para superar a Oklahoma (99-89) nun bo partido de Drew Gooden (20 puntos), que compensa en parte a pésima noticia da semana, a confirmación de que Ginóbili perderase o resto da temporada. Máis apuros pasaron os Blazers para gañar en Memphis (96-93). Barndon Roy rouboulle a bola a Mike Conley e asegurou a vitoria dos de Oregon. No outro partido da xornada os Timberwolves gañáronlles aos Clippers (87-77). (A foto da web da NBA)

O DÍA DE WILL BYNUM

Todas as aspiracións dos Bobcats por estar nos playoffs pasaban por vencer aos Pistons, oitavos, en Detroit. Mais bateron co verdugo máis inesperado: Will Bynum, terceiro base dos Pistons, que fixo o partido da súa vida. Anotou 32 puntos, 26 deles no último cuarto!!!, record histórico da histórica franquía de Michigan. Unha auténtica xesta que certifica a presenza do seu equipo na postemporada. Coa súa actuación estelar, Bynum desequilibrou finalmente (97-104) un partido que os Bobcats gañaban por un ao remate do terceiro cuarto. En Nova Jersey, os Sixers fixeron o peor partido (67-96) da temporada e volvéronlle ceder o quinto posto da Conferencia aos Heat. Para os de DiLeo apenas Louis Williams anotou máis de dez puntos. Miller e Iguodala, decisivos a noite anterior ante os Pistons, quedaron nuns tristes 7 e 5 puntos respectivamente e piden a berros descanso de cara aos playoffs. Pola súa banda, en the Q de Cleveland, os Cavs resarcíronse das súas dúas últimas e humillantes derrotas ante Wizards e Magic, cunha clara vitoria (81-101) ante San Antonio Spurs. Lebron James anotou 38 puntos. En Toronto, os Knicks vingáronse (112-103) dos Raptors, que viñan de gañar no Madison, e cortaron a xeira de seis vitorias seguidas da franquía canadense malia os 31 puntos e 14 rebotes de Chris Bosh. No Oeste, os Nuggets aproveitaron a derrota de San Antonio para afianzarse no segundo posto impoñéndose claramente aos Timberwolves (110-87). Os Rockets tamén deron un paso importante na súa loita polo cuarto posto ao gañarlle (88-102) ao seu rival directo, os Blazers. Os Mavericks, entrementres, sepultaron as poucas opcións dos Suns de entrar nos playoffs cun contundente 116-140. No duelo entre dous equipos en declive, os Jazz impuxéronse na cancha dos Hornets (108-94). Os Lakers, moi relaxados nas últimas semanas, vnceron no derbi anxelino ante os Clippers (88-85). Outros partidos: Warriors- Kings (105-100), Pacers-Thunder (117-99). (A foto da web da NBA)

HUMILLADOS EN ORLANDO

Os Cleveland Cavaliers levaron hoxe a maior malleira (87-116) que lembran en moito tempo e ante un rival directo na loita polo título de Conferencia, os Orlando Magic. Os dous equipos chegaban ao partido con propósito de enmenda despois das súas respectivas derrotas ante equipos frouxos (os Cavs en Washington e Orlando ante Toronto) e o partido comezou con igualdade. Ilgauskas e Lebron anotaban nun lado mentres que na cancha contraria os Magic repartíanse as canastras procurando sempre o mellor tiro. Foi no segundo cuarto cando a segunda unidade de Orlando comezou a romper o partido. Cunha magnífica defensa, os de Florida chegaban axiña a canastra contraria e anotaban con facilidade por medio de Anthony Johnson, Battie e Haedo Turkoglu. Aos Cavs, en cambio, costáballes un mundo atopar canastras fáciles. Lebron emperrábase en asumir o liderado do equipo en ataque pero as súas porcentaxe de tiro eran arrepiantes. Chegouse ao descanso con 55-38 e despois do traballo de minado da seguna unidade de Van Gundy, na reanudación a primeira fixo un estrago. Rashard Lewis anotou catro triples en cinco minutos e os Magic marcaron un parcial de 24-4. O marcador (81-42) era xa humillante e os de Mike Brown non tiñan resposta. Ata de 41 chegaron a ir perdendo, algo insólito en toda a carreira de Lebron James. O partido xa non tivo historia e o último cuarto disputárono os xogadores de fondo de armario. A derrota é moi dolorosa para os Cavs que fai tres días andaban co orgullo moi subido. Haberá que ver que efecto teñen as derrotas ante Wizards e Orlando de aquí en diante, se xeneran dúbidas sobre as posibilidades do equipo ou se, pola contra, resultan un revulsivo para que o equipo non volva decaer. Para Orlando, pola contra, é unha grande inxección de moral, mentres perseveran na súa loita polo segundo posto da Conferencia cos Boston Celtics, que non perdoaron no Garden ante os Atlanta Hawks (92-104) nun novo partido sen Kevin Garnett. Kendrick Perkins, sen embargo, estivo xenial achegando 12 puntos, 10 rebotes e sete tapóns. No Leste, Carlotte Bobcats perdeu unha nova opción para asaltar os play offs. Perdeu (97-92), non sen loita, na súa cancha ante Miami Heat, que se recupera na súa loita cos Sixers polo quinto posto. Dwyane wade anotou 27 puntos e deu asistencias. No Oeste, os Spurs e os Blazers foron os grandes beneficiados da xornada. San Antonio impúxose (126-121) no Conseco Fieldhouse de Indiana cun gan partido, coma sempre, de Tony Parker (31 puntos e 10 asistencias) e Duncan (22 puntos e 11 rebotes). Manu Ginóbili vaise tamén reincorporando pouco a pouco a dinámica do equipo e hoxe ofreceu moi bos números (16 puntos, 7 rebotes e 7 asistencias). Portland, pola súa banda, arrasou sen contemplacións Oklahoma (107-72), nun partidazo de Lamarcus Aldridge (35 puntos e 18 rebotes). Portland ponse cuarta superando aos Rockets, que perderon no Staples Center ante os Lakers (81-93). Tamén perderon os Jaz e os Hornets, que están a facer un patético treito final da Liga Regular. Os Jazz mesmo perdena fiabilidade na súa cancha. Perderon (103-102) ante os Timberwolves desaproveitando máis unha vez a vantaxe de dez puntos no descanso e os 34 puntos e 11 asistencias de Deron Williams. Os Hornets, pola súa banda demostraron unha vez máis que non poden aspirar a gran cousa mentres o equipo empece e acabe en Chris Paul e David West, que hoxe anotaron 74 dos 103 puntos do seu equipo. (43 Paul e 31 West). Foi insuficiente para superar os Warriors (103-111), nos que Jamal Crawford anotou 39 puntos. Tampouco os Dallas Mavericks conseguiron a vitoria hoxe anto so Memphis Grizzlies (102-107).  Fóra da loita polos postos de play off, os Suns arrasaron ás "dúas bandas" dos Kings (111-139), con oito xogadores en dobles díxitos de anotación. (A foto de Rashard Lewis da web da NBA).

PROCURANDO O MELLOR CRUCE

A estas alturas da temporada, cos 16 equipos que participarán nos play offs practicamente decididos, queda a intriga por coñecer que posto ocuparan finalmente e polo tanto cales poderán ser os cruces. No Leste, Boston Celtics e Orlando Magic disputan o segundo posto. Os Celtics recuperárono hoxe despois de gañar nun intensísimo partido aos Bobcats que precisou de dúas prórrogas. Como tantas outras veces decidiu un triple de Ray Allen dende un recanto a dous segundos do final para poñer o 109-111 definitivo. Allen estaba so por un despiste defensivo de Gerald Wallace, un despiste que pode costarlle caro a Charlotte nas súas aspiracións por entrar nos play offs. Paul Pierce foi o máximo anotador do partido con 32 puntos. Kevin Garnett non xogou para darlle repouso ao seu xeonllo dereito. Nos Bobcats, malia o erro do final, o máis destacado foi, como contra os Lakers, Gerald Wallace, que anotou 20 puntos e apañou 10 rebotes. Destacable foi tamén a achega do rookie D.J. Augustine cun 4 de 4 en triples. Os Celtics recuperan o segundo posto porque Orlando Magic perdeu (99-95) por fin despois dunha xeira longa de vitorias. Fixérono ante os Toronto Raptors, que xa sen opción algunha de salvar a temporada están a facer estes días o mellor xogo do ano. Levan unha xeira de cinco vitorias seguidas e unha notable recuperación da súa imaxe, que estaba francamente polo chan. Chris Bosh (24 puntos e 12 rebotes), e Shaun Marion (17 puntos e 13 rebotes) foron os líderes do equipo canadense, mentres que polos de Florida Dwight Howard achegou 20 puntos e 11 rebotes. O principal pecado de orlando foi o desacerto nos tiros de tres (7 de 26). Outra loita fermosa é a que manteñen Miami e Philadelphia polo quinto posto de Conferencia, que se cruzaría nos cuartos cos Atlanta Hawks. Os Sixers teñen a oportunidade gañándolle hoxe aos Bucks de roubarlle esa posición a Miami que perdeu na cancha dos Dallas Mavericks (96-98). O base rookie dos Heat Mario Chalmers tivo a oportunidade de darlle a vitoria ao seu equipo pero pecou de novato e cometeu falta en ataque sobre Josh Howard, que levaba media hora agardando por el. Nowitzki con 30 puntos gañou o duelo entre a anotadores a Dwyane Wade que quedou en 23. Os Pistons, pola súa banda, desaproveitaron a oportunidade de afastar as pantasmas despois da derrota dos Bobcats e caeron claramente na cancha dos Nets (98-111). No Oeste todas as opcións son posibles agás o primeiro posto dos Lakers, que gañaron non sen problemas na visita a Milwaukee (104-98). Kobe Bryant anotou 30 puntos e o xogador dos Bucks Ramon Sessions asinou un espectacular triple doble (16 puntos, 16 asistencias e 10 rebotes). O resto das prazas, do segundo ao oitavo son unha incógnita e calquera cousa pode pasar polo que se agardan grandes partidos de aquí ao remate da Liga regular. Os Hornets, de traxectoria errática nas últimas semanas, gañaron na cancha dos Clippers 104-98 con 30 puntos, 14 asistecias e 6 roubos de balón de Chris Paul. Os Rockets perderon en Phoenix (109-114), debido en boa medida ao partidazo de Nash (25 puntos e 17 asistencias). No resto da xornada os Grizzlies gañáronlles aos Wizards (107-112) mentres que, en Oakland, no duelo californiano entre Sacramento e os Golden State Warriors viviuse unha auténtica loucura, 141-143 despois dunha prórroga. O base dos Warriors, Monta Ellis, anotou 42 puntos, colleu 9 rebotes e deu 9 asistencias mentres que para os Kings, Kevin Martin anotou nada menos que 50 puntazos (23 dende a liña dos tiros libres). (A foto de Kevin Martin, que hoxe anotou 50 puntos, da web da NBA)

OS BOBCATS PÓÑENSE FARRUCOS

Os Charlotte Bobcats están a merecer a recompensa dos play offs. O equipo do gran Larry Brown gañoulle (84-94) onte aos Lakers e está xa a só un partido dos Bulls, oitavos de conferencia, e a dous dos Pistons, sétimos. Os Bobcats apelaron á intensidade defensiva para superar aos de Phil Jackson. Raja Bell encargouse de Kobe Bryant, que anotou 25 puntos mais cun pobre 11 de 28 en tiros de campo. Baixo os aros deuse un fermoso duelo entre Gasol e Emeka Okafor. O catalán foi con todo o mellor do seu equipo rozando o triple doble (16 puntos, 11 rebotes e 7 asistencias). En cancha contraria destacou a participación de Gerald Wallace, que fixo un dos grandes partidos da súa carreira con 21 puntos e 13 rebotes. A vitoria dos Bobcats mételle presión aos irregulares Chicago Bulls, que perderon na cancha de Indiana Pacers (105-107) cunha canastra de T.J.Ford a falta de tres segundos para o final. Vinnie del Negro apenas utilizou sete xogadores en todo o partido, destacando o rookie Derrick Rose con 24 puntos, 6 asistencias e 11 rebotes, o máximo da temporada. Polos de Indiana, como sempre destacou Danny Granger no apartado anotador con 31 puntos e Troy Murphy no xogo interior (15 puntos e 12 rebotes). Os Pistons tampouco poden respirar tranquilos, inda que a súa derrota de hoxe era comprnsible pois visitaban Quicken Loans Arena de Cleveland. Os Cavaliers sumaron a súa decimoterceira vitoria consecutiva (73-79) e seguen a agrandar o record histórico da franquía.Os de Mike Brown superaron mesmo unha pésima porcentaxe en tiros de campo (38,6, mellor con todo ca dos Pistons, 35,4%) e grazas máis unha vez a Lebron James (25 puntos e 12 rebotes), sumaron a vitoria 36 en 37 partidos disputados este ano na súa cancha. Noutro partido entre equipos do Leste, os Sixers conseguiron unha meritoria vitoria (85-98) ante os Atlanta Hawks. Os de Philadelphia, porén, teñen que lamentar a lesión de Thaddeus Young que escordou un nocello, inda que parece que poderá retornar axiña á dinámica do equipo. O xogo colectivo dos Sixers, nos que destacou o rookie Speights con 16 puntos compensou a boa achega indiviual de Josh Smith (33 puntos) e Ronald Murray (19) por parte dos Hawks. No Oeste, continúa a xeira triunfal de Denver Nuggets, que venceron na súa cancha aos New York Knicks (104-111). Os de George Karl son actualmente segundos de Conferencia. Carmelo Anthony con 29 puntos e Nené Hilário con 18 puntos e 12 rebotes foron os mellores do seu equipo. Decepcionan, porén, os Utah Jazz, que esta madrugadada saíron escaldados do Rose Garden de Portland (104-125). Lamarcus Aldridge e Brandon Roy (25 e 11 asistencias), foron os mellores dos Blazers ante uns Jazz moi pobres. Tampouco pode presumir demasiado New Orleans Hornets, que gañaron apenas por un punto (111-110) a Sacramento, grazas sobre todo aos 40 puntos de David West. Neste partido, os Kings retiraron a camisola de Vlado Divac. Tamén resulta desconcertante a actaulidade dos Spurs, que perderon en San Antonio (96-95) ante Oklahoma, con 31 puntos de Kevin Durant. Por último, Dallas gañou con autoridade na cancha de Minnesota (108-88). (A foto de Gerald Wallace da web da NBA)

CARMELO ARRASA EN DALLAS

Carmelo Anthony exhibiuse en Dallas no partido máis interesante da xornada desta madrugada (103-101). A derrota é preocupante para os Mavericks, pois prodúcese ante os Nuggets, un rival directo e á espera de visitar Cleveland, que só perdeu un partido na súa cancha no que vai de temporada. Carmelo meteu 43 puntos e apañou 11 rebotes, ademais de asumir a responsabilidade nos minutos decisivos do partido. Os Mavericks, sen Jason Kidd nin Josh Howard por lesión foron a rebufo todo o partido. Ao comezo do último cuarto ían 10 por abaixo e emerxeu a figura de Barea para meterlle emoción ao partido a base de triples. Insuficiente ante a actuación memorable de Carmelo, ben escoltado por J.R Smith. Entre os dous anotaron 65 dos 103 puntos do seu equipo. Mentres, os Hornets, sen Stojakovic nin Tyson Chandler, perderon (93-103) no Madison Square Garden ante uns Knicks que levaban seis partidos sen gañar. Os de Chris Paul están nunha dinámica moi irregular e ocupan agora mesmo o posto sétimo na Conferencia Oeste. Unha situación preocupante que deixa ver como Byron Scott, alén de Chris Paul e David West, ten un  plantel máis ben escaso para cumprir coas aspiracións do equipo. E en Nova Jersey os Lakers, que andan de xira polo Leste, gañaron (103-95) grazas a unha actuación descomunal de Pau Gasol (36 puntos, 11 rebotes e 7 asistencias). O catalán foi o líder indiscutible do seu equipo, pois Kobe tivo un día máis que discreto (leva uns últimos partidos algo baixo). O partido rompeuse no terceiro cuarto grazas a un parcial de 24-2 para os californianos. Porén, a segunda unidade de Jackson non estivo á altura e non soubo administrar intelixentemente a vantaxe no marcador. Os Nets tiveron opcións de remontar ata o último minuto, mais cando os Lakers se sentían realmente ameazados aparecía grandioso Pau Gasol en defensa e en ataque. Na xornada gañaron tamén os tres líderes do Leste: Cleveland Cavaliers a Minnesotta Timberwolves (85-107), Boston Celtics a Atlanta Hawks (99-93) e Orlando Magic a Milwaukee Bucks (94-110). Os Sixers perderon (100-95) na súa propia cancha ante os Bobcats que xa lle botan o bafo na caluga aos Pistons, oitavos da Conferencia. Dalembert tivo máis unha vez unha penosa actuación (4 puntos e 4 rebotes en 22 minutos). O mellor: Iguodala con 25 puntos.

OS ROCKETS GAÑAN EN NOVA ORLEANS

Os Rockets, que viñan de perder (88-85) un emocionante partido contra os Spurs no que Artest mesmo tivo a oportunidade de forzar a prórroga, deron esta noite unha mostra de autoridade impoñéndose 95-84 en Nova Orleans. Adelman deixou fóra do partido a Yao Ming, con gripe, e deulle a titularidade ao veterano Dikembe Mutombo, que xogou o seu quinto partido e disputou case 25 minutos. O de Kinshasha, de 42 anos, apenas anotou un tiro libre, pero achegou seis rebotes e sobre todo tres tapóns a un pobre sophomore, Julian Wright, que tivo que saír escocido do partido. Luis Scola e Carl Landry apoiárono perfectamente no xogo interior. O arxentino, un dos xogadores máis regulares da Liga anotou 14 puntos e apañou 12 rebotes (leva 26 dobles-dobles esta temporada, os mesmos que Gasol ou Paul Millsap). Partido curioso o de Ron Artest, que rexistrou unha pésima porcentaxe de 0 de 11 en tiros de campo nos dous primeiros cuartos. Non se arredou e despois de cravar catro seguidas acabou sendo un dos artífices da vitoria do seu equipo con 18 puntos. Esta racha coincidiu cun parcial de 16-2 que serviu para darlle a volta a un partido que os Hornets gañaban por 11 (55-44). Chris Paul (29 puntos, 11 asistencias) e David West (16 puntos, 13 rebotes), foron como sempre os mellores do seu equipo.

Resultado curioso o de Oklahoma, onde os Thunder se impuxeron aos Spurs con exiguo marcador (76-78). Durant anotou 25 puntos pero a clave do partido estivo na superioridade dos homes do banco dos Thunder sobre a segunda unidade de Oklahoma. De feito, nos dez primeiros minutos San Antonio ía gañando de 17 puntos. A derrota empañou o partido 1.000 de Gregg Popovich como adestrador da NBA.

No resto de partidos malleira dos Nuggets aos Nets (96-121) e dos Bobcats a uns lastimeiros Raptors (86-112) e vitoria cómoda dos Blazers na cancha dos Grizzlies (103-92). (Foto de Mutombo da web da NBA)